Fjarhitanetið verður nú útbygt, so størri partur av kommununi kann fáa gagn av fjarhita. Fyri stuttum vórðu eitt nú Finsen, SMS og Tórsvøllur knýtt í, og so er bara ein spurningur um tíð, nær sethús kunnu gagnnýta fjarhitan eisini.

Fjarhitafelagið hevur saman við Tórshavnar kommunu og arbeiðstakaranum gjørt eina arbeiðsætlan fyri miðbýin, og henda ætlan er býtt upp í ymisk arbeiðsøki.

Fjarhitafelagið fer við arbeiðsætlanini at tryggja, at íbúgvar, stovnar og vinnurekandi í økinum ikki verða tarnað, meðan grivið verður.

Talan er um arbeiðsøkini, sum eru víst á tekning, nevnd grevstrarætlan.

Hvørt arbeiðsøki verður stongt fyri almennari ferðslu, meðan arbeitt verður í ásetta økinum. Grivið verður frá rundkoyringini við Vesturkirkjuna og oman eftir Landavegnum. Síðani sneiða vit niðan eftir Dalavegnum og oman í Niels Winthers gøtu, og haðani niðan eftir Tróndargøtu og Kongagøtu, har vit so festa saman við verandi fjarhitanetið við Sjónleikarhúsið.

Áðrenn farið verður víðari til næsta øki, verður gjørt, so at koyrandi verður eftir undanfarna øki. Samstundis verða atlit tikin, so at tíðin, har skift verður millum arbeiðsøki, verður so stutt, sum til ber.

Samlaða byggitíðin verður frá oktobur 2020 til desembur 2021.